இளமைக் காலம்

சுந்தர ஸ்வாமிகளுக்கு ஒன்னறை வயதாகும் போதே பெற்றோர் இறைவனடி சேர்ந்ததால், தாய் மாமா வேங்கட் சுப்பையர் வீட்டில் வளர்ந்தார். சகோதரர் குப்பாணி சிவத்துடன் கங்கைகொண்டானிலிருந்து பத்தமடைக்கு கல்விக்காகப் புலம்பெயர்ந்தார். ஐந்து வயதில் அட்சர அப்பியாசமும், ஏழு வயதில் உபநயனமும் நடைபெற்றது. பத்தமடையில் ஸ்ரீ கிருஷ்ண கனபாடிகளிடம் வேத அத்யாயனம் பயின்று, கல்வி மற்றும் கேள்விகளில் சிறந்து விளங்கினார். தினமும் ஒரு லட்சம் முறை பஞ்சாட்சர மந்திரம் ஜபித்தார்.

திருமணம் மற்றும் குருவின் அருள்

16 வயதில் நெல்லை மாவட்டம் அடைச்சாணி கிராமத்தைச் சேர்ந்த ஜானகியுடன் திருமணம் நடந்தது. மாமனார் ராமசுப்பைய்யர், சிவபூஜை நியமங்களையும், பாணலிங்கம், ஸ்ரீ நடராஜர், சிவகாமி அம்மாள் விக்கிரகங்களையும் வழங்கினார். விஸ்வேஸ்வர சாஸ்திரிகளிடம் மந்திரோபதேசம் பெற்று குருவாக ஏற்றார். மனைவிக்கு மந்திர உபதேசம் செய்து முதல் சீடராக ஏற்றார்.

சீடர்கள் மற்றும் யாத்திரைகள்

சில ஆண்டுகளில் பல சீடர்கள் சேர்ந்தனர். தாமிரபரணி ஆற்றங்கரையிலுள்ள திருத்தலங்களை தரிசிக்கும் புனித யாத்திரை மேற்கொண்டு, சூத சம்ஹிதை பிரசங்கம், சிவபஜனை நடத்தினார்.

காசி யாத்திரை

மதுரை, திருச்சி, திருவையாறு, மாயவரம், சீர்காழி, சிதம்பரம், வேதாரண்யம், விருத்தாசலம் போன்ற தலங்களை தரிசித்து, காசியை அடைந்தார். கங்கையில் புனித நீராடி ஆலயங்களை தரிசித்து யோகிகளுடன் உரையாடினார்.

மகா கணபதி சுவாமிகள் சந்திப்பு – முடிவு

ஆறு மாத காலம் நீருக்கு அடியிலேயே வசிக்கும் யோகப் பயிற்சியையும் அறிந்த மகா கணபதி சுவாமிகள் கங்கை நதிக்குள் தவம் செய்து கொண்டிருந்ததை அறிந்து, ஸ்வாமிகளும் அங்கு சென்று சந்தித்து பல அரிய தகவல்களை பரிமாறிக் கொண்டுள்ளனர்.இன்றும் மணிகர்ணிகா கட்ட படித்துறையில் இந்த இரண்டு துறவிகளது விக்கிரகங்களை தரிசிக்கலாம்!

பத்தமடை – குழந்தை உயிர்ப்பித்த அதிசயம்

பத்தமடையில் ஒரு சமயம் யக்ஞேஸ்வரன் என்கிற 5 வயது குழந்தை வாய்காலில் தவறி விழுந்து இறந்து போனது, அக்குழந்தையின் குடும்பமே துயரில் ஆழ்ந்து அழுது புலம்பிக்கொண்டிருந்தநிலையில், அங்கு வந்த சுந்தர ஸ்வாமிகள் குழந்தையின் சடலத்தின் மீது மந்திர ஜலம் தெளித்து நெற்றியில் விபூதி பூசி சில ஸ்லோகங்களை கூறி சிவபிரானைத் துதிக்க அக்குழந்தை தூங்கி எழுவது போல் விழித்தெழுந்தது. இதைக் கண்ட அக்குழந்தையின் பெற்றோர்கள் வணங்கி, புகழ்ந்து கொண்டாடினர்.

சுத்தமல்லி – சூத சம்ஹிதை பிரசங்கம் மற்றும் ஸந்நியாசம்

பின்னர் ஸ்வாமிகள் சுத்தமல்லி சூரியநாராயணசிவன் அவர்கள் அழைப்பிற்கிணங்க சுத்தமல்லியில் சூத சம்ஹிதை பிரசங்கம் நடத்தினார். சேஷால தீக்ஷிதர் முதலிய வைதீக சிரேஷ்டர்கள் இந்நிகழ்ச்சியில் கலந்துக் கொண்டனர். இந்நிலையில் இரண்டாம் நாள் படனம் தொடங்கி பிரசங்கம் நடக்கும் மத்தியில் ஸ்வாமிகள் சேஷால தீக்ஷிதரை நோக்கிப் பிரசங்கத்தை தொடர்ந்து நடத்த கண்களால் சமிக்ஞை செய்து விட்டு வெளியே வந்து சிகையையும் யக்ஞோபவீதத்தையும் களைந்தெரிந்து வித்வத் ஸந்யாசம் பெற்றுக்கொண்டு சபைக்குள் பிரவேசித்து மீண்டும் பிரசங்கத்தைத் தொடங்கினார். அப்போது ஸ்வாமிகளுக்கு 21 வயது. சபையிலுள்ளோர் ஆச்சரியத்துடன் பார்க்க ஸ்வாமிகள், எப்பொழுது வைராக்கியம் ஜனிக்கிறதோ அப்பொழுதே சந்யாஸம் கொள்ளவேண்டும் என்று வேதம் முறையிடுவதை அவர்களுக்கு எடுத்துரைத்தார்.

திருநெல்வேலி – சங்கர மடத்தில் வாசம்

அதன் பின்னர் மூன்று நாள் படனமும் செய்து பிரசங்கத்தை பூர்த்தி செய்து ஸ்வாமிகள் திருநெல்வேலி வந்து ஸ்ரீ சங்கராச்சார்ய ஸ்வாமிகள் மடத்தில் வாசம் செய்தார். அரிய வேதாந்தங்களால் புகழப்படுகின்ற அந்த பரம்பொருளை அறிந்த பின் கொள்கின்ற மெய்த்துறவு பெற்ற துறவிகளில் முதன்மை பெற்றார் ஸ்ரீ சுந்தர ஸ்வாமிகள்.

கோடகநல்லூர் – நாணல் புதருக்குள் தபஸ்

நெல்லை சங்கர மடத்தில் சில காலம் வசித்த ஸ்வாமிகள், அதன் பின்னர் நெல்லையை அடுத்த கோடகநல்லூரை அடைந்தார். அங்கு தாமிரபரணிக் கரையோரத்தில் நெடுநெடுவென்று வளர்ந்திருக்கும் நாணல் புதர்களுக்குள் சென்று எவரும் தன்னை அணுகமுடியாதபடி நிஷ்டையில் ஆழ்ந்திருப்பார். அக்காலத்தில் அவரது பக்தர்கள் நாணல் புதர்களிடையே தேடிச் சென்று திருவமுது செய்விக்க வருவர். பசி வந்த பொழுது ஸ்வாமிகள் வெளிவந்து யாராவது அன்னங்கொண்டு வந்து காத்திருந்தால் சில கவளங்களை அருந்திவிட்டு மீண்டும் புதருக்குள் சென்றுவிடுவார். இப்படி சென்று கொண்டிருக்கையில் ஒரு நாள் அன்ன ஆகாரம் எதுவும் இன்றி ஸ்வாமிகள் நிஷ்டையில் இருக்கும்போது, தன் பக்தனின் பசியை பொறுக்காத சிவபெருமான் அந்தணர் வடிவில் அன்னப் பாத்திரத்துடன் தோன்றி ஸ்வாமிகளின் பசியாற்றி, சுந்தர ஸ்வாமிகளுக்கு தரிசனம் தந்தருளியுள்ளார். இப்படி கோடகநல்லூரில் வாழ்ந்த ஸ்வாமிகளுக்கு பின்னாளில் கோடகநல்லூர் சுந்தர ஸ்வாமிகள் என்று பெயர் வந்தது.

காஞ்சி கம்பா நதிக்கரை – அக்னி அதிசயம்

ஸ்வாமிகள் காஞ்சி கம்பா நதிக்கரையில் வசித்த போது, ஒரு தீபாவளி நாளன்று இராமசந்திர மேத்தா முதலான பக்தர்கள் பலருக்கு ஸ்வாமிகள் போஜன விதிகளைப் பற்றி பிரசங்கம் செய்து கொண்டிருந்தார். அப்போது, வலது உள்ளங்கையில் அக்னி இருக்கிறது அதனால் அன்னம் சாப்பிடும் போது உள்ளங்கையில் படும்படி உண்ணக்கூடாது. அது நீச போஜனத்திற்கு சமானம் என்று உரைத்தார். இந்நிலையில், அத்தலத்தில் காமாக்ஷியைப் பூஜிக்கும் சுப்ரமணிய பட்டர் என்பவர் கொண்டு வந்த அக்னியானது மழையினால் அவிந்து விடவே, சுப்ரமணிய பட்டர் அங்கிருந்த ஸ்வாமிகளிடம் சீடர்களைக் கொண்டு சிறிது அக்னி ஏற்படுத்தி தந்து அருள வேண்டும் என்று வேண்டினார். ஸ்வாமிகளும் ஆவுடையப்ப பிள்ளை என்பவரிடம் தடிவீரன் கோவில் தெருவில் சென்று அக்னி எடுத்துவரும்படி ஆணையிட்டார். அப்போது பக்கத்திலிருந்த இராமசந்திர மேத்தா ஸ்வாமிகளை பார்த்து, நீங்கள் சற்று முன் செய்த உபன்யாசத்தின் படி உள்ளங்கையில் உள்ள நெருப்பை வரவழைக்கலாமே என்று கேட்க ஸ்வாமிகளும் உங்கள் உத்ரியத்தை தாருங்கள் என்று கேட்டு வாங்கி அதனை தம் உள்ளங்கையில் வைத்து தேய்க்க குபீரென அக்னி துணியில் பற்றியது. இதைக் கண்டதும் இராமசந்திர மேத்தா நான் அறியாமல் பிழை செய்துவிட்டேன் பொறுத்தருள வேண்டும் என்று இறைஞ்ச ஸ்வாமிகள் நகைத்து இது ஒரு வேடிக்கை நீங்கள் அஞ்சவேண்டாம் என்று கூறி அருளினார்.

நெல்லையப்பர் கோவில் – தீப கைங்கரியம்

அதன் பிறகு ஸ்வாமிகள் ஒரு ஐப்பசி மாதத்தில் பிரதோஷ தரிசனத்திற்காக நெல்லையப்பர் கோவிலுக்குச் சென்றபோது அங்கு அதிக தீபம் ஏற்றப்பட்டிருப்பதைக் கண்டு இது கோவில் ஏற்பாடா? வழிபாடா என்று கேட்க, கோயில் மணியம் சுப்ரமணிய பிள்ளையால் யாசகம் எடுத்து நிறைவேற்றப்பட்டது என்று கூற ஸ்வாமிகள் சுப்ரமணிய பிள்ளையை நோக்கி இக்கைங்கரியத்தை விடாது இயற்றி வாருங்கள் என்று கூறி ஆசீர்வதித்தார்.

லட்ச தீப விழா – ஆரம்பம்

அதன் பின்னர் பக்தர்களுடன் ஸ்வாமிகளே திருநெல்வேலியைச் சூழ்ந்த கிராமங்களுக்கு விஜயம் செய்து லட்ச தீபம் இட வேண்டும் என்று குறிப்பிட்டார். அதன் பின் பதினொரு தினம் மஹாருத்ராபிஷேகம், வேதபாராயணம், சூதஸ்ம்ஹிதா படனம் ஆகியவை நடந்தேறி 11ம் நாள் இரவு லட்ச தீப விழாவும் நடந்தேறியது. இந்த லட்ச தீப விழா கி.பி.1864ம் வருஷம் தை மாதம் திங்கட்கிழமை அமாவாசை, திருவோணம் நட்சத்திரத்தன்று நடந்தது. அன்று தொடங்கிய லட்ச தீப விழா இன்று வரை ஆறு ஆண்டுகளுக்கு ஒருமுறை நடந்து வருகின்றது.

பஜனை மடம் – சிவபஜனை உபதேசம்

ஸ்வாமிகள் திருநெல்வேலியில் பஜனை மடத்தில் தங்கியிருக்கையில் கோ சிதம்பரம் பிள்ளை என்பவருக்கு சித்தம் உருகுவதற்குச் சிவபஜனையே சிறந்த சாதனம் என்று கூறி அப்பஜனை மடத்திலேயே இருக்க வைத்து பஜனைகள் சரிவர நடத்தும் படி ஆக்ஞனையிட்டார்.

சிருங்கேரி ஜகத்குருவின் விஜயம்

ஸ்வாமிகள் பஜனை மடத்தில் தங்கியிருந்த அதே நேரத்தில் தான் சிருங்கேரி மடாதிபதி ஜகத்குரு ஸ்ரீ சங்கராசாரியார் திருநெல்வேலிக்கு விஜயம் செய்தார். அப்போது அப்பகுதியில் உள்ள பக்தர்கள் சிலர் சுந்தர ஸ்வாமிகள் நீங்கலாக அப்பகுதியில் இருந்த துறவிகளுக்கு அழைப்பு விடுத்து இருந்தனர்.

சிருங்கேரி ஜகத்குருவுடன் சந்திப்பு

இதையறிந்த ஜகத்குரு தன் சிஷ்யர்களில் ஒருவரை அனுப்பி சுந்தர ஸ்வாமிகளை அழைத்து வரும்படி கூற ஸ்வாமிகளும் அழைப்பை ஏற்று ஜகத்குருவை சந்திக்க வந்தார். சுந்தர ஸ்வாமிகள் வந்தவுடன் ஜகத்குருவே ஸ்வாமிகளை எதிர்கொண்டழைத்து ஆசனத்தில் அமர வைத்து சுந்தர ஸ்வாமிகளுக்கு அழைப்பு அனுப்பாமல் இருந்தவர்கள் அறிய சுந்தர ஸ்வாமிகளின் மகிமையை விவரமாக எடுத்துரைத்து சுந்தரஸ்வாமிகள் ஒரு அவதார புருஷர் என்பதையும் கூறினார். அன்று முதல் ஸ்ரீ சுந்தர ஸ்வாமிகள் மஹா ஸந்நிதானம் என்றே வழங்கப்பட்டு வருகின்றார்.

புதுக்கோட்டை – சூதஸம்ஹிதை பிரசங்கம் மற்றும் ஞான வாதங்கள்

அதன் பின் புதுக்கோட்டைக்கு விஜயம் செய்த ஸ்வாமிகளை போற்றி வரவேற்ற அவ்வூர் பக்தர்கள் ஸுத ஸம்ஹிதை பிரசங்கத்தை ஐந்து நாள்கள் நடத்தவேண்டும் என்று கோர ஸ்வாமிகளும் அதற்கு உடன்பட்டு ஸுதஸம்ஹிதையின் பொருளை உரைத்தார். அத்தருணத்தில் அங்கிருந்த சில வேதியர்கள் ஸ்திரீகளுக்கும் சூத்திரருக்கும் ஞான விசாரத்தில் அதிகாரம் கிடையாதெனச் சுருதியில் சொல்லப்பட்டிருக்கும் பொழுது ஈஸ்வர பிரசாதத்தால் ஞானம் எல்லோருக்கும் எளிதில் கிடைக்கும் என்று ஸ்வாமிகள் சொல்வது எப்படி பொருந்தும் என்று ஸ்வாமிகள் காதில் படும்படி வாதிட்டனர். உடன் ஸ்வாமிகள் இச்சந்தேகத்தை இறைவனே இங்கு தீர்த்து வைப்பான் என்று கூறினார்.

சிவகாமி – ஐந்து வயது சிறுமியின் ஞான நிலை

அச்சமயத்தில் ராமஸ்வாமி சாஸ்திரிகள் ஐந்து வயதுள்ள சிவகாமி என்னும் தம்பெண்ணைக் கையிற் பிடித்துக்கொண்டு ஸ்வாமிகளை தம் இல்லத்தில் வந்து பிக்ஷை கொள்ளுமாறு அழைத்தார். சுந்தர ஸ்வாமிகள் அந்த குழந்தையை நோக்கி குழந்தாய் உனக்கு என்ன வேண்டும் என்று வினவ அக்குழந்தையும் பெரியாரைத் தரிசனம் செய்வதும், ஞானானந்தத்தில் மூழ்க வேண்டுவதையும் தவிர்த்து வேறு என்ன வேண்டும் என்று பதிலளித்தது. ஸ்வாமிகளும் அவ்வாறே ஆகுக என்று கூறி தம் வலக்கையினால் குழந்தையின் நெற்றியில் விபூதியிட்டுச் சின்முத்திரை செய்துவித்து வீடுபேற்றினையளிக்கும் ஒரு மந்திரமொழியை உபதேசித்து வீட்டிற்கு அனுப்பினார். வீடு வந்ததும் அக்குழந்தை உபதேசம் பெற்ற மொழிகளைச் சிந்தித்து சமாதியில் அமர்ந்தது.

அரங்கக்கோன் – வண்டிக்காரனின் ஆன்மிக வெளிப்பாடு

இரண்டாம் நாள் படன சமயத்தில் ராமஸ்வாமி சாஸ்திரகளின் வண்டிக்காரனான அரங்கக்கோன் என்பவன் பிரசங்க மத்தியில் ஸ்வாமியின் பாதம் பணிந்து யான் பிரம்ம ஸ்வரூபம் என்று உரக்கக் கூறி வேதாந்த தத்துவங்களை விளக்கினான். இவ்விரு சம்பவங்களால் சந்தேகமுற்று கேள்வி கேட்டவர்கள் ஐயம் தெளிந்தனர். ஸ்வாமிகள் ஸ்திரீகளையும், சூத்திரர்களையும் சீடராய் அங்கீகரித்து அவர்களுக்கு ஞானம் புகட்டினார்.

அரிமளம் சிவராமன் செட்டியார் மற்றும் புதுவயல் அழகப்ப செட்டியார் சீடத்துவம்

இவ்வாறாக சூதஸ்மஹிதாபடனம் ஐந்து நாளும் நடந்தேறியது. புதுக்கோட்டையில் வசித்து வந்தபோது அரிமளம் சிவராமன் செட்டியாரும், புதுவயல் அழகப்ப செட்டியாரும் ஸ்வாமிகளிடம் உபதேசம் பெற்று சீடர்களானார்கள்.

ராமேஸ்வர யாத்திரை – அன்ன அதிசயம்

திருப்பத்தூர் வந்ததும் இராமசிவனை அழைத்து இராப்போஜனத்திற்கு ஏழு கட்டி அன்னம் கோவிலில் வாங்கி வரும்படி கூறினார். நேரம் தாமதமாக கதவு பூட்டப்பட்டதால் உபவாசம் கூறி அனைவரும் உறங்கினர். பின்னர் பரமசிவன் பரிசாரகர் வடிவில் வந்து அன்னம் கொடுத்து அருள் புரிந்தார்.

திருமயம் வழியில் – சிவபெருமான் வண்டி திருப்பிய அதிசயம்

மீண்டும் ராமேஸ்வர யாத்திரை புறப்பட்டபோது, திருமயம் தாண்டி சென்றவுடன், சிவபெருமான் ஸ்வாமிகளின் திருவுருவத்தில் வந்து வண்டியை புதுக்கோட்டைக்கு திருப்பச் சொன்னார். பிறகு புயல் ஏற்பட்டது தெரிய வந்ததால், கடவுளின் கிருபை என ஸ்வாமிகள் புகழ்ந்தார்.

அரிமளம் – அஷ்டபந்தன கும்பாபிஷேகம் மற்றும் அன்னசத்திரம்

அரிமளத்தில் மீனாக்ஷி சுந்தரேஸ்வரர் கோவிலுக்கு அஷ்டபந்தன கும்பாபிஷேகம் நடத்தப்பட்டது. அங்கு பழைய சத்திரம் மூடப்பட்டிருந்ததால், திறக்காவிட்டால் தானும் உணவருந்த மாட்டேன் என்று விரதம் இருந்து, பின்னர் சத்திரம் திறக்கப்பட்டு இன்றுவரை அன்னதானம் நடைபெறுகிறது.

கோயிலூர் – சூதஸம்ஹிதை படனம்

கோயிலூரிலும், பிற ஊர்களிலும் ஸ்வாமிகள் சூதஸம்ஹிதை படனம் நடத்தி, சிவபக்தி பிரசங்கம் செய்து, பக்தர்களை உருவாக்கினார்.

மதுரை – பொற்றாமரை குளத்தில் உயிர்த்தெழுந்த சீடர்

மதுரையில் சீடரான நாராயண சிவன் நீர் மேல் யோகநிஷ்டை செய்யும் போது மூழ்கி மூன்று நாட்கள் காணாமல் போனார். மூன்றாம் நாள் உடல் மிதந்தபோது, ஸ்வாமிகள் விபூதி பூசி மந்திரம் ஓதி உயிர்ப்பித்தார்.

உமையாள்புரம் – சிவபெருமான் வேடம் பூண்ட அதிசயம்

அதன்பின் ஸ்வாமிகள் பல ஊர்களுக்கு யாத்திரை சென்ற சமயத்தில் உமையாள்புரம் கிராமத்தை நெருங்கும் சமயத்தில், சிவபெருமான் சுந்தர ஸ்வாமிகளின் சீடர்களில் ஒருவரான நாராயணசிவன் போல் வேடம் பூண்டு அவ்வூரில் வசிக்கும் அம்பாம்பாள் என்ற ஒரு பிராமணப் பெண்மணியிடம் சென்று நாளை காலை பத்துமணிக்கு சுந்தர ஸ்வாமிகள் இங்கே வர இருக்கிறார் ஆதலால் அதற்குள் சமையல் செய்து பிள்ளையார் கோவிலுக்கு கொண்டு வந்து சேர்க்கவேண்டும் என்று கூறி சென்றார். அதன்படி அந்த அம்மையாரும் அமுதுடன் அங்கு வந்து காத்திருக்க சுந்தர ஸ்வாமிகள் தனியே அங்கு வந்து திருவமுது கொள்ளும் நேரத்தில் நீங்கள் வருவதை எனக்கு அறிவித்த நாராயணசிவன் எங்கே என்று கேட்க, சுந்தர ஸ்வாமிகள் ஆச்சரியமுற்று அவர் தற்சமயம் நாமகல்லுக்கு அருகிலுள்ள முத்தக்காப்பட்டியிலன்றோ இருக்கிறார் என்று கூறி, ”ஐயனுடைய பொய் வேடம் அது. எனக்கு அமுதளிக்கும் போதெல்லாம் இப்படி பொய் வேடம் பூணுவதை வழக்க வைத்திருக்கிறார்” என்று உரைத்து ஆனந்தக் கண்ணீர் உகுத்தார்.

சென்னை – புஷ்பகிரி மடத்தில் பிரசங்கம்

பின்னர் சுந்தர ஸ்வாமிகள் தமது சீடர்களுடன் சென்னை நகருக்கு விஜயம் செய்து கூர்ஜர பிராமணர்கள் ஏற்பாட்டின் பேரில் புஷ்பகிரி மடத்தில் தங்கினார். சென்னையில் ஜீவாபாய் அம்மாள், அவரது கணவர் சுப்பராய டாக்கர், அம்பா சங்கர் தவை, ராஜாராஜம் தருவாடி, ராஜுபாய் அம்மாள் டகட் ஆகியோர் சிஷ்யர்களானார்கள். சென்னையில் சூதசம்ஹிதா பிரசங்கம் நடந்தபோது இரண்டாம் நாள் படன சமயத்தில் அங்கு வந்த சிலர் ஸ்வாமிகளின் மகிமையைக் குறித்து சந்தேகித்துப் பேசுவதை அறிந்த ஸ்வாமிகள் சூத சம்ஹிதைக்கு பொருள் சொல்லிக்கொண்டே தான் அமர்ந்திருந்த பீடத்துடன் அந்தரத்தில் எந்தவொரு ஆதாரமின்றி இருந்தார். அதைக் கண்ட அவர்கள் தங்கள் தவறை உணர்ந்தனர். கிருஷ்ணாஞ்சிதவை ரத்தினங்களால் இழைக்கப்பட்ட கெளரீ சங்கர் மாலை ஒன்று செய்வித்து 1905 ஆம் வருடத்தில் சுந்தர ஸ்வாமிகள் கோவிலில் சமர்ப்பித்தனர். டாக்கர் வம்சஸ்தாரர்களும், ஜீவாபாய் அம்மாளின் பெண் சந்ததியைச் சேர்ந்த மேத்தா குடும்பஸ்தர்களும், ஜீவாபாய் அம்மாளின் சகோதரர் வம்சத்தாரும் சுந்தர ஸ்வாமிகளின் திருவுருப்படத்தை இன்றும் பூஜித்து வருகிறார்கள்.

திருவையாறு – சப்தஸ்தானக் கும்பாபிஷேகம் மற்றும் நெய் அதிசயம்

பிறகு சென்னையிலிருந்து காசிக்கு ஸ்வாமிகள் புறப்பட்டார். அதன் பின் சப்தஸ்தானக் கும்பாபிஷேகம் நடத்த பற்பல இடங்களிலும் பணம் திரட்டியபின் திருவையாறு வந்து சேர்ந்து திருவையாற்றுக் கும்பாபிஷேகத்தைக் குப்பாணி சிவனும், திருச்சோற்றுத்துறை, திருவேதிசூடி, திருக்கண்டியூர், திருநெய்த்தானம், திருப்பெரும்புலியூர், திருமழபாடி, திருத்திங்களூர், திருக்கடுவெளி முதலிய ஸ்தலங்களில் பிற சீடர்கள் கும்பாபிஷேகம் நடத்த கட்டளையிட்டார். இந்த கும்பாபிஷேகமானது 1872ல் நடந்துள்ளது. ஒரே நாளில் ஒரே நேரத்தில் ஏழு கோவில்களுக்கும் கும்பாபிஷேகம் நடைபெற்றது. இதில் ஆச்சரியம் என்னவெனில் எல்லா கோவில்களிலும் ஸ்வாமிகள் இருந்துள்ளார்.
இந்த கும்பாபிஷேகத்தில் இன்னொரு அதிசய சம்பவமும் நிகழ்ந்துள்ளது. கும்பாபிஷேகத்தில் பங்கெடுத்த அந்தணர்கள் மதிய உணவிற்காக அமர்ந்திருந்தனர். அந்த நேரத்தில் உணவு பரிமாரும் ஒருவர் ஓடி வந்து உணவில் சேர்ப்பதற்கும், அந்தணர்களுக்கு பரிமாறுவதற்கும் நெய் இன்னும் வரவில்லை என்ன செய்வது என்று தவிப்புடன் ஸ்வாமிகளிடம் முறையிட அவரோ கோவில் குளத்தில் நான்கு குடங்கள் தண்ணீர் எடுத்து வாருங்கள் என்று கட்டளையிட்டார். பிறகு ஸ்வாமிகள் ஐயாரப்பரை பிரார்த்தித்து அவர் கொண்டு வந்த நான்கு குட நீரிலும் விபூதியை மெல்ல தூவ, மறுகணம் குடங்கள் அனைத்திலும் கமகமவென நெய்வாசனை வந்தது. சிறிது நேரத்தில் நெய் வியாபாரி நெய் கொண்டு வந்ததும், ஒரு குட நெய்யை கோவில் குளத்தில் விடச் சொன்னார். இறைவன் கொடுத்ததை அவனுக்குத் திருப்பி தருவதே மரியாதை என்றார்.
இரண்டாம் நாள் செலவிற்கு பணம் குறைவாக இருந்ததால், ஸ்வாமிகள் தம் சால்வையை விரித்து வைத்திருக்க, பக்தர்கள் திரவியமும் பெண்கள் நகைகளும் சமர்ப்பித்தனர்.

மற்ற கும்பாபிஷேகங்கள்

அதன்பின்னர் கங்கைகொண்டான் ஆனந்தவல்லி சமேத கயிலாசநாதர் கோவிலின் கும்பாபிஷேகத்தை 1873ம் ஆண்டு நடத்திக் கொடுத்தார். சுந்தர ஸ்வாமிகள் வாழ்நாளில் 22 கும்பாபிஷேகங்களை நடத்தி வைத்தார். முதல் கும்பாபிஷேகம் அரிமளத்திலும், கடைசி கும்பாபிஷேகம் கங்கைகொண்டானிலும் நடந்தது.

பிரம்ம கீதைக்கு உரை

திருநெல்வேலியில், சீடர்கள் பிரம்ம கீதையை தமிழில் மொழிபெயர்க்க வேண்டிக் கேட்டனர். சொக்கலிங்கம் பிள்ளை எழுதிய மொழிபெயர்ப்பு, தத்துவராய ஸ்வாமிகள் முன்னரே எழுதிய உரையுடன் ஓருரையாக இருந்ததால், ஸ்வாமிகள் அதற்கு உரை இயற்றினார்.

பத்தமடை கோவிலில் திருடர்களை விரட்டிய அதிசயம்

குலசேகர பட்டணத்தில் சூத ஸ்ம்ஹிதா படனம் நடத்துகையில், தமையனார் குப்பாணி சிவன் மறைவையும், பத்தமடை கோவிலில் திருடர்கள் வந்ததையும் ஞானத்திருஷ்டியால் அறிந்து, சப்தம் கொடுத்து ஊராரை எழுப்பினார். அடுத்த நாள் வந்த கடிதங்களிலும் அது உறுதிப்படுத்தப்பட்டது.

மகாவாக்கியச் சுருக்கம் மற்றும் பிற நூல்கள்

அரிமளத்தில் தங்கி இருக்கும் போது, ஸ்வாமிகள் மகாவாக்கியச் சுருக்கம், வேதாகம், சம்பிரதாயபிரகரணம், மனோநாகமார்க்கம் முதலிய நூல்களை இயற்றி, முன்னைய பிரசுரங்களையும் சேர்த்து “நிஜானந்த விலாசம்” எனப் பெயரிட்டார்.

மகா சமாதி

ஸ்வாமிகள் சமாதி அடையும் நாள் நெருங்குவதை சீடர்களிடம் தெரிவித்தார். வெகுதான்ய வருஷம் (கி.பி. 1878) ஐப்பசி மாதம் 6ஆம் தேதி, திங்கட்கிழமை கிருஷ்ணபக்ஷ தசமி அன்று, நர்மதா பாணலிங்கத்தை சீடர்களிடம் கொடுத்து, “இதனை பிரதிஷ்டை செய்யும் இடத்தில் சிவபெருமான் பரிபூரண சந்நித்யம் இருக்கும்” என்று அருளி, பிரம்ம ஸ்வரூபத்தில் கலந்தார்.
சிவராமன் செட்டியார் ஆலயம் நிறுவி, பாணலிங்கத்தை பிரதிஷ்டை செய்து கும்பாபிஷேகம் நடத்தி, நித்திய ஆராதனைகள் நடைபெறும் வகையில் ஏற்பாடு செய்தார்.

இன்றும் அவ்விடத்தில் வெகு சிறப்பாக பூஜை முதலியன அந்தணர் மூலம் நடைபெற்று வருகின்றன. அந்த லிங்கத்தைச் சிரத்தையுடன் பணிந்து தவம் செய்வோர்க்கு இகபர சாதனங்கள் யாவும் கிட்டும்படிப் பரமானந்தம் அளித்துப் பிரகாசித்துக் கொண்டிருக்கிறார் ஸ்ரீ சுந்தர ஸ்வாமிகள்